انٹرویو ایونٹ ... ادبی کہکشاں 2018
تحریر نمبر 1
قلمکار : منصور عالم قاسمی
******************************
غزل
کرکے قلم فروخت قلم کار گر پڑے
قدموں پہ میرِ شہر کے فن کار گر پڑے
صدیوں سے جو کھڑے تھے یہاں امن کے منار
نفرت کی بادِ تند سے اس بار گر پڑے
ربّ کلیم ! ایسا کوئی معجزہ دکھا
فرعون کا ہر ایک فسوں کار گر پڑے
اتنا غرور ٹھیک نہیں بڑھتی مانگ پر
قیمت نہ تیری پھر سرِ بازار گر پڑے
آؤ پرندو ! گھر پہ ہمارے بناؤ گھر
طوفاں کی چال سے سبھی اشجار گرپڑے
بیمار ماں کوچھت سے سرِ راہ پھینک دی
پڑھ کرخبر یہ، ہاتھ سے اخبار گر پڑے
منصور ! اپنا رتبئہ بالا سنبھال رکھ
ایسا نہ ہو کہ پرچمِ کردار گر پڑے
No comments:
Post a Comment