Sardar Sahil Taruf wa Ghazal

سردار ساحلؔ

بساطِ سخن پر سردار ساحل کا ورود اگرچہ ابھی تازہ تازہ ہے تاہم ان کی فکری کاوشوں اور فنِ شعر سازی سے رغبت کودیکھتے ہوئے پیش قیاسی کی جاسکتی ہے کہ آگے چل کر اہلِ ادب کی توجہ اپنی جانب مبذول کرانے میں کامیاب ہوجائینگے۔شاعری کے ساتھ ساتھ ان میں ادبی وتنقیدی شعور بھی ہے۔ان کے تنقیدی مضامین اور تبصرے بھی رسائل کی زینت بننے لگے ہیں۔

پورا نام سردار خواجہ معین الدین ہے اور سردار ساحل ان کی ادبی شناخت۔کڈپہ میں ان کی ولادت ۱۵؍اپریل۱۹۸۷؁ء کو ہوئی۔والدِ محترم کا اسمِ گرامی جناب سردار ظہیر الدین ہے۔بی۔اے پاس ہیں۔شعر وادب کا رچا بسا ذوق پایا ہے اور ہر دو میدان میں اپنی تخلیقیت افروزیوں کا ثبوت دے رہے ہیں ۔ان کا ادبی سفر اگرچہ ابھی  ابتدائی دور میں ہے لیکن خوشی کی بات ہے کہ ایک قلیل عرصہ میں تین مجموعے ترتیب دے چکے ہیں جن کے نام ہیں۔(ا)اقبال کی شاعری۔ایک مطالعہ(تنقیدی)(۲)آگہی(شعری مجموعہ)اور (۳)شعرائے کڈپہ کی غزلیں۔یہان ان کی شاعری گفتگو کا محور ہے۔مختصراً کہنا چاہونگا کہ انہیں عصری مسائل کا شعور و ادراک ہے اور ان کی شاعری میں داخلی وخارجی محسوسات کا عکس صاف جھلکتا ہے جسے آپ زیرِ نظر غزل میں بھی دیکھ سکتے ہیں۔

رابطہ۔3/151

کرسچین لین۔کڈپہ۔

(A.P)516001 

غزل

پتھروں کا یک بیک حملہ ہوا 

ہر طرف تھا آئینہ بکھرا ہوا

پوچھتے ہو میرے دل کو کیا ہوا 

جو کلیسا تھا کبھی کعبہ ہوا

آزماتا ہی رہا دشمن مجھے 

اور ہر بازی میں وہ پسپا ہوا

تونے پائے ہیں سمندر علم کے

تیری باتوں سے یہ اندازہ ہوا

 

پیش کی محفل میں جب میں نے غزل

میرے فن کا ہر طرف چرچا ہوا

شاعروں کے درمیاں چشمک بڑھی

کیسے لکھوں پھر نتیجہ کیا ہوا

بزم میں ساحلؔ مرے فن کا چراغ

سب نے دیکھا روشنی دیتا ہوا